今晚喺中立场沙特阿拉伯继续西班牙超级盃4强赛事，衞冕嘅巴塞隆拿大战上届西班牙盃亚军奥沙辛拿。巴塞隆拿歇冬後表现好转，联赛绝杀拉斯彭马斯後，上场西盃半力出击亦成功晋级，火力明显有所提升，今仗对住实力一般嘅奥沙辛拿赢面甚高，但主胜冇肉食，转捧2.5球入球大。
■（周五凌晨3时开赛）
巴塞隆拿今季表现经常受到批评，不过球员质素始终有保证，往往能够喺逆境中搵到赢波方法，近3场比赛都赢对手1球。巴西前锋洛基费拉拿1月加盟後，锋线有更多变化，上场西盃小胜巴尔巴斯特罗3比2之役，下半场就换入洛基费拉拿同罗拔利云度夫斯基，与费伦托利斯组成3叉戟，效果唔错，罗拔佬末段更有士哥。
巴塞隆拿上年喺沙特重夺西超盃，依家备受压力嘅教练沙维，当然想重温好梦为自己减压，阵中主将根度简、罗拔利云度夫斯基、法兰基迪庄等身经百战，喺争入决赛嘅重要场合，「冠军DNA」值得信赖，不过近6场正式赛事都有失波，其中5场开3球或以上，防守不稳下，随时以攻代守。
另边厢，奥沙辛拿首次参加西超盃，演出难有保证，上场西班牙盃对丙组仔卡斯迪隆，都要踢到加时先赢波，球员明显不在状态。再者，巴塞隆拿近4次对奥沙辛拿全胜，有格食格味道，留意当中有3场开3球或以上，既然巴塞近期有前冇後，捧入球大更划算。
