赛事分析：克罗地亚例抢缰半Ｗ起筷

今晚欧国外D组关键战，阿美尼亚主场硬撼克罗地亚。依家两军同分，为争出线一定搏甩髀，不过克罗地亚实力秤先之余，上仗大胜信心返晒嚟，加上佢哋出战欧国外例抢缰，半场客胜有计。（周二凌晨零时开赛）

虽然阿美尼亚一向只系欧洲三线球队，但喺今届欧国外表现不俗，头4轮取得2胜1和1负，绝对唔失礼。不过要留意，阿美尼亚呢4仗都有失波，尤其两斗榜首土耳其，都系领先之下最终失分，首轮喺主场土耳其反输1比2，上仗作客喺下半场初段打破僵局，却於完场前被追和1比1，防线明显唔够集中。

克罗地亚由於6月嗰阵要踢欧国联，所以佢哋喺欧国外D组只系踢咗3场，现时与踢多1场嘅阿美尼亚同得7分排次席，但落後踢咗5轮嘅土耳其3分，只要今仗击败阿美尼亚，克军出线形势便大好。查实「格仔兵团」上轮大炒拉脱维亚5比0，总算走出欧国联失冠嘅阴霾，睇番佢哋今届3仗欧国外录2胜1和，全部上半场取得领先优势，今仗势必先发制人，一开波即嚟料，半场客胜咪错过。